...zikaltër...

Roberto Mançini vazhdon që të jetë një prej trajnerëve më të diskutuar në Serinë A. Gjatë këtij sezoni, ku në kampionatin italian polemikat për gjyqtarët kanë qenë shumë të ashpra, trajneri i Interit ka hedhur vazhdimisht "benzinë në zjarr", duke sulmuar të gjitha ekipet kundërshtare. Skuadra kryeson bindshëm kampionatin, por e njëjta gjë nuk mund të thuhet për ecurinë në Ligën e Kampioneve. Në ndeshjen e kthimit me Liverpulin, e cila do të luhet më 11 mars, zikaltërit duhet të përmbysin disavantazhin 2-0, të regjistruar përpara dy javëve. Një sfidë që merr vlera të dyfishta për Mançinin. Trajneri duhet të shmangë eliminimin e skuadrës për të dytin vit radhazi nga turi i dytë i aktivitetit më të rëndësishëm për klube në kontinent dhe të shpëtojë stolin nga "sulmi" i Rafa Benitez. Në fakt, sipas tabloidit britanik "Daily Star", tekniku i Liverpulit është në krye të listës së preferencave të presidentit Massimo Moratti, në rast se ky i fundit do të vendoste që në fund të sezonit të ndryshonte drejtuesin e stolit. Ky vendim do të merrej, vetëm në rast se Interi do të vazhdonte të zhgënjente në Champions. Pra, nëse kampionët e Italisë do t‘i jepnin lamtumirën kompeticionit evropian, Benitez do të kapte "shah mat" me dy lëvizje Roberto Mançinin.Gjithsesi, në këtë periudhë mjaft delikate të sezonit, trajneri i Liverpulit ka vendosur që të mos prishë qetësinë e skuadrës. Edhe pse e ardhmja e tij në "Anfilld Roud" është vënë disa herë në dyshim ("Reds" janë sërish jashtë garës për titullin kampion në Angli), Benitez ka shprehur besimin se do të vazhdojë të drejtojë skuadrës "edhe për shumë kohë". Spanjolli ka marrë drejtimin e skuadrës në vitin 2004, por gjatë këtij sezoni ai ka pasur një debat shumë të ashpër me pronarët amerikanë, Xhorxh Xhilet dhe Tom Hiks, rreth politikës së ndjekur në merkaton e futbollistëve. Megjithatë, në Angli po qarkullojnë zërat se drejtuesit e klubit janë të gatshëm që t‘i rinovojnë kontratën Benitezit, edhe pse ai ka diçka më shumë se një vit e gjysmë të mbetur në marrëveshjen aktuale. "Kam besim se do të qëndroj këtu edhe për shumë kohë, jo vetëm për dy vjet", ka bërë të ditur Benitez në sajtin zyrtar të klubit. "Kontrata ime me klubin përfundon pas 18 muajsh, por jam i bindur se vitin e ardhshëm do ta kemi më të lehtë dhe se në të ardhmen situata do të ndryshojë. Mendoj se po përparojmë në drejtimin e duhur: gjëja e vetme që mendoj në këto çaste është përmirësimi i Liverpulit dhe objektivi për të fituar sa më shumë tituj me këtë klub. Nuk po kërkoj asnjë skuadër tjetër. Jam shumë i kënaqur këtu dhe mendoj se në të ardhmen skuadra mund të jetë edhe më e fortë, për këtë arsye dëshiroj të qëndroj. Liverpuli është një klub i madh dhe me shumë histori".

Zikaltërit nuk humbasin jashtë fushe në kampionat prej 20 muajsh.Interi nuk ka humbur asnjë ndeshje në Serinë A që prej 18 prillit 2007 (1-3 në "San Siro" kundër Romës), ndërkohë që në takimet jashtë fushës së saj, skuadra e Mançinit nuk humbet që prej 30 prillit 2006 (1-0 në Empoli). Në Xhenoa, në sfidën me Sampdorian, dukej se kishte ardhur koha që libri i rekordeve të rishkruhej, megjithatë, goli i Krespos ka barazuar rrjetën e shënuar më parë nga Kasano. Por, pas 3 ditëve zikaltërit duhet t‘i harrojnë shifrat dhe të përqendrohen te sfida për kreun me Romën: ata duhet të bëjnë pa Stankoviç të dëmtuar dhe të zgjidhin polemikat e Vieira, që pas zëvendësimit ka shfaqur pakënaqësitë ndaj Mançinit.